Yuxarı
    Bağlamaq

    "G20" dövlətlərinin toplantısında Ankara Bəyannaməsi qəbul olunub

    Azərbaycanın əmək və əhalinin sosial müdafiəsi naziri Səlim Müslümov yığıncaqda çıxış edib

    Bakı. 4 sentyabr. REPORT.AZ/ Ankara şəhərində Türkiyənin sədrliyi ilə dünyanın iqtisadi cəhətdən ən çox inkişaf etmiş 20 ölkəsini əhatə edən "G20" qrupuna üzv və qonaq ölkələrin əmək və məşğulluq nazirlərinin toplantısı keçirilib. Yığıncağın sonunda Ankara Bəyannaməsi qəbul olunub. Bu barədə"Report"a Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.

    Məlumata görə, bəyannamə hamı üçün keyfiyyətli iş yerlərinin yaradılması, tarazlı və davamlı inkişafa yardım məqsədilə bərabərsizliklərin azaldılması və bacarıqların inkişafına investisiya qoyuluşu məqsədlərinə yönəlib. Sənəddə əmək və məşğulluq nazirləri tərəfindən son illər dünya əmək bazarında özünü göstərən tendensiyalar müzakirə edilməklə, bu sahədə gələcək fəaliyyət prioritetləri müəyyən olunur. Prioritetlər sırasına daha çox sayda, həmçinin layiqli iş yerlərinin və daha inkluziv əmək bazarının yaradılması, sosial cəhətdən həssas qruplardan olan şəxslərin potensial imkanlarından tam istifadənin reallaşdırılması, onların əmək bazarına açıq, inklüziv və bərabər hüquqlu çıxış imkanlarına malik olmasına şərait yaradılması daxildir. Eyni zamanda, sənəddə iqtisadi artım üçün vacib olan insan resurslarının inkişafına, peşə bacarıqlarının, əmək vərdişlərinin təkmilləşdirilməsinə investisiyanın artırılması, əmək bazarına səmərəli monitorinqin tətbiqi və s. fəaliyyət istiqamətləri əksini tapır.

    Qeyd edək ki, Türkiyənin sədrliyi ilə fəaliyyət göstərən "G20" qrupunun üzvü olan və dəvət edilən ölkələrin əmək və məşğulluq nazirlərinin toplantısında Azərbaycanı əmək və əhalinin sosial müdafiəsi naziri Səlim Müslümovun başçılıq etdiyi nümayəndə heyəti təmsil edib. Tədbirdə S.Müslümov Azərbaycanda dinamik iqtisadi tərəqqi şəraitində əmək bazarının inkişafı, yeni iş yerlərinin yaradılması, əhalinin məşğulluq imkanlarının artırılması və işsizliyin azaldılması, insan resurslarının təkmilləşdirilməsi sahəsində aparılan işlər və əldə olunan nailiyyətlər barədə ətraflı məlumat verib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi