Fazil Talıbov Əmək və Əhalinin Sosial Müdafiəsi Nazirliyində müdir müavini vəzifəsinə təyin olunub

Bakı. 4 iyun. REPORT.AZ/ Fazil Talıbov Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin müdir müavini vəzifəsinə təyin olunub.

F.Talıbov "Report"a açıqlamasında bildirib ki, şöbə müdirinin müavini vəzifəsinə təyin olunsa da, nazir Sahil Babayevin əmri ilə şöbə müdirinin vəzifələrinin icrasını da ona həvalə edilib: "Hazırda plan üzərində işləyirik, yaxın vaxtlarda ictimaiyyətlə əlaqələr üzrə strategiyamız, konsepsiyamız hazırlanacaq. Əmək və Əhalinin Sosial Müdafiəsi Nazirliyi Prezident İlham Əliyevin apardığı sosial siyasəti icra edən mərkəzi icra hakimiyyəti orqanıdır. Nazirlik həssas əhali qrupları ilə iş aparır, onların sosial vəziyyətini təhlil edir. Bizim əsas məqsədimiz nazirliyin gördüyü işləri, islahatları, ictimaiyyətin indiyə qədər az bildiyi istiqamətləri onlara operativ şəkildə çatdırmaqdır. Bundan sonra ictimaiyyətdən gələn siqnallara adekvat, operativ münasibətimiz olacaq, buna indidən sizi əmin edə bilərik".

Qeyd edək ki, bu təyinatadək Fazil Talıbov Standartlaşdırma, Metrologiya və Patent üzrə Dövlət Komitəsinin İctimaiyyətlə əlaqələr şöbəsinin müdiri vəzifəsində çalışıb. Həmin Komitə Prezident İlham Əliyevin 20 aprel 2018-ci il sərəncamı ilə ləğv olunub.