Yuxarı

Azərbaycanın 4 rayonu üzrə Tibbi-Sosial Ekspert Komissiyası üçün müasir iş şəraiti istifadəyə verilib

TSEK-lərin yeni iş şəraitləri və tibbi ekspertiza avadanlıqlarına baxış olub

Bakı. 31 avqust. REPORT.AZ/ Qazax və Ağstafa rayonları üzrə 27 saylı, Şəmkir və Gədəbəy rayonları üzrə 29 saylı Tibbi-Sosial Ekspert komissiyaları (TSEK) müasir tələblərə uyğun iş şəraiti ilə təmin olunublar. Bu barədə "Report"a Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən məlumat verilir.

ƏƏSMN-in Əlillərin sosial müdafiəsi siyasəti şöbəsinin müdiri Saday Abdullayev bildirib ki, əvvəllərdə TSEK-lər daimi inzibati binaları olmadığına görə ayrı-ayrı yerlərdə, müxtəlif təşkilatlara məxsus binalarda, uyğun olmayan şəraitdə yerləşirdilər və tibbi-sosial ekspertizanın aparılması üçün müasir avadanlıqlara da malik deyildilər. Ötən ilin ortalarından artıq bu çətinliklər aradan qaldırılır və nazirliyin 38 TSEK-indən artıq 30-a yaxını yeni inzibati binalarda müasir iş şəraiti və ekspertiza avadanlıqları ilə təmin edilib. Belə şərait təbii ki, komissiyalarda əhaliyə layiqli səviyyədə xidmət göstərməyə, əlillik müayinələrinin normal şəkildə aparılmasına imkan verir. Qısa müddətdə digər TSEK-lərdə də belə şərait yaradılacaq.

Tibbi-sosial ekspertiza sisteminin avtomatlaşdırılması sahəsində görülən işlər də diqqətə çatdırılıb. Qeyd olunub ki, tətbiq olunan Tibbi-Sosial Ekspertiza və Əlillərin Reabilitasiyası İnformasiya Sistemi əlillik müayinəsi ilə bağlı səhiyyə müəssisələri və TSEK-lər arasında elektron məlumat mübadiləsinə şərait yaradıb. Bu da əlillik müayinəsinin aparılması ilə bağlı vətəndaşla məmur arasında təmasların xeyli azalmasını, tibbi-sosial ekspertiza xidmətində müasir iş üsullarının formalaşmasını şərtləndirir. Görülən işlərin müsbət nəticələri kimi, bir tərəfdən əlilliyi olan şəxslər arasında reabilitasiya göstəriciləri yüksəlib, digər tərəfdən isə əlillik və reabilitasiya məsələləri ilə əlaqədar nazirliyə və digər instansiyalara şikayət xarakterli müraciətlərin sayı kəskin şəkildə azalıb.

Tədbirlərdə TSEK-lərin yeni iş şəraitləri və tibbi ekspertiza avadanlıqlarına baxış olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi