​Azərbaycanda son bir ildə əlilliyin dinamikasında azalma qeydə alınıb

Bakı. 29 yanvar. REPORT.AZ/ Azərbaycan Əmək və Əhalinin Sosial Müdafiəsi Nazirliyi (ƏƏSMN) tərəfindən tibbi-sosial ekspertiza xidmətində şəffaflığın təminatına nəzarətin gücləndirilməsi nəticəsində son bir ildə ilkin və təkrar əlillik qrupu təyin olunanların sayı azalıb. Bu barədə “Report”a nazirliyin İctimaiyyətlə əlaqələr şöbəsindən bildirilib.

Belə ki, ötən il ƏƏSMN-nin Tibbi-sosial ekspert komissiyaları tərəfindən ilkin əlillik qrupu təyin olunanların sayı 2013-cü illə müqayisədə 7 664 nəfər azalıb. Hesabat dövründə həmçinin təkrar əlillik qrupu təyin olunan şəxslərin sayında azalma 3 937 nəfər təşkil edib.

Ümumilikdə tam reabilitasiya göstəricisi 2,9 faizdən 3,8 faizə, hissəvi reabilitasiya göstəricisi isə 0,7 faizdən 2,7 faizə yüksəlib. Bu dövrdə ƏƏSMN-nin bərpa-müalicə müəssisələrində 7 837 nəfər bərpa-müalicə xidməti ilə təmin edilib, habelə nazirlik tərəfindən 76 nəfər əlilliyi olan şəxsin, 85 nəfər sağlamlıq imkanları məhdud uşağın xarici ölkələrdəki ixtisaslaşmış reabilitasiya mərkəzlərində müalicə kursu keçməsi təşkil olunub.