Azərbaycana əcnəbilər xarici işlər nazirinin dəvəti ilə gələndə də vizanı ölkə ərazisində ala biləcəklər

Bakı. 5 oktyabr. REPORT.AZ/ Azərbaycana əcnəbilər və vətəndaşlığı olmayan şəxslər xarici işlər nazirinin dəvəti ilə gələndə də vizanı Azərbaycan ərazisində ala biləcəklər.

“Report” xəbər verir ki, bununla bağlı Prezident İlham Əliyev “Azərbaycan Respublikasına gələn əcnəbilərə və vətəndaşlığı olmayan şəxslərə vizaların rəsmiləşdirilməsi ilə bağlı bəzi məsələlər haqqında” fərmanında dəyişiklik edilməsi barədə fərman imzalayıb.

Əcnəbilər və vətəndaşlığı olmayan şəxslər indiyədək Azərbaycana yalnız Prezidentin, Baş nazirin, Milli Məclis sədrinin, Prezident Administrasiyası rəhbərinin, Naxçıvan Muxtar Respublikası Ali Məclisi sədrinin, Prezidentin İşlər İdarəsi müdirinin, Prezidentin Xüsusi Tibb Xidməti rəisinin rəsmi dəvəti ilə gəldikdə vizanı ölkə ərazisində ala bilirdilər. Dəyişikliklə siyahıya xarici işlər naziri də əlavə edilib.