Yanvarda Azərbaycandan 4,3 mln. dollar dəyərində polipropilen ixrac olunub

Bakı. 7 mart. REPORT.AZ/ Bu ilin yanvar ayında Azərbaycandan 4,3 mln. ABŞ dolları dəyərində ilkin formalı polipropilen ixrac edilib.

“Report” xəbər verir ki, bu barədə İqtisadi İslahatların Təhlili və Kommunikasiya Mərkəzinin “İxrac İcmalı”nın 2019-cu ilin fevral buraxılışında qeyd olunub.

Bildirilib ki, 2019-cu ilin yanvar ayından etibarən qeyri-neft ixracında ilkin formalı polipropilen də önə çıxmağa başlayıb. Bu isə ondan xəbər verir ki, “SOCAR Polymer” layihəsi ixracda öz sözünü deməyə başlayır.

Bu sənaye kompleksi daxili bazarın tələbatını tam ödəyəcək və məhsulun izafi qalan 75%-ni Türkiyə və Avropa bazarlarına ixrac edəcək. Nəticədə “SOCAR Polymer” layihəsi Azərbaycanın qeyri-neft sektorunun ixrac gəlirlərini 15% artıracaq.

Xatırladaq ki, "SOCAR Polymer" layihəsinə illik istehsal gücü 184 min ton olan Polipropilen Zavodu və illik istehsalı 120 min ton təşkil edən Yüksəksıxlıqlı Polietilen Zavodu daxildir. Polipropilen Zavodunun açılışı 2018-ci il iyulun 18-də Azərbaycan Prezidenti İlham Əliyev və İtaliya Prezidenti Sercio Mattarellanın iştirakı ilə olub. Oktyabrın 5-də polipropilenin ixracına başlanılıb. İlkin olaraq 170 ton məhsul Türkiyə bazarına ixrac olunub. Məhsulun ixracını SOCAR-ın ticarət qolu - “SOCAR Trading” şirkəti həyata keçirir.