Sumqayıtda sulfat turşusu istehsalı müəssisəsində işlərin 85 %-i tamamlanıb

İqtisadiyyat Nazirliyinin Sumqayıt Kimya Sənaye Parkının rezidenti “Azərsulfat” MMC-nin sulfat turşusu istehsalı müəssisəsində avadanlıqların quraşdırılması (montajı) işlərinə başlanılıb.

"Report" xəbər verir ki, bu barədə İqtisadiyyat Nazirliyi məlumat yayıb.

Bildirilir ki, müəssisənin investisiya dəyəri 6 milyon ABŞ dollarıdır, layihə üzrə indiyə qədər görülən işlərə artıq 5 milyon dollar sərmayə qoyulub və işlərin 85%-i tamamlanıb.

“Azərsulfat”a 2020-ci ilin iyul ayında rezidentik statusu verilib. Sənaye müəssisəsi idxalın əvəzlənməsində və ixrac potensialının genişləndirilməsində əhəmiyyətli rol oynayacaq.