Sumqayıt Kimya Sənaye Parkının rezidentlərinin sayı artırılır

"Sumqayıt Kimya Sənaye Parkında gələn il yeni rezidentlərin fəaliyyətə başlaması gözlənilir".

"Report" xəbər verir ki, bunu İqtisadi Zonaların İnkişafı Agentliyinin sədri vəzifəsini icra edən Elşad Nuriyev deyib.

Onun sözlərinə görə, Sumqayıt Kimya Sənaye Parkında rezidentlik statusu almaq üçün 3 şirkət müraciət edib: "Həmin şirkətlərin 2-i yerli şirkətdir, biri isə Çin kapitallı xarici şirkətdir".

Xatırladaq ki, Sumqayıt Kimya-Sənaye Parkının rezidentləri tərəfindən indiyədək 3 milyard ABŞ dolları həcmində investisiya yatırılıb. Mövcud layihələr üzrə əlavə 312 milyon manat investisiyaların qoyulması və 1 300-dək yeni iş yerlərinin yaradılması nəzərdə tutulub.

Qeyd edək ki, Sumqayıt Kimya Sənaye Parkı Azərbaycan Prezidenti İlham Əliyevin 2011-ci il 21 dekabr tarixli Fərmanı ilə yaradılıb.

Sumqayıt şəhərində yerləşən və nəhəng infrastruktura malik Sumqayıt Kimya Sənaye Parkının ərazisi 508,14 hektar təşkil edir. Sənaye parkının ərazisində neft-kimya və digər prioritet sənaye sahələri üzrə rəqabət qabiliyyətli məhsulların (işlərin, xidmətlərin) istehsalı və emalı müəssisələri yaradılır. Hazırda sənaye parkında 24 rezident var.