Britaniyanın qızıl hasilatçısı şirkəti satdığı qiymətli metalların həcmlərini açıqladı

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti 2020-ci ilin yekunları ilə bağlı satış həcmlərini açıqlayıb.

“Report”un şirkətin açıqladığı hesabata əsasən verdiyi məlumata görə, 2020-ci il ərzində şirkət tərəfindən satışı həyata keçirilən qızıl külçələrinin həcmi 48 650 unsiya təşkil edib. Bu, 2019-cu ilin yekunlarının göstəriciləri ilə müqayisədə 5 342 unsiya və ya 9,9 % azdır.

Ötən il ərzində bir unsiyanın satış qiyməti orta hesabla 1 777 ABŞ dolları təşkil edib ki, bu da 2019-cu ilin orta qiymət göstəricisi ilə müqayisədə 367 ABŞ dolları və ya 26 % çoxdur.

2020-ci maliyyə ilində şirkət tərəfindən satışı həyata keçirilən mis konsetratının həcmi 11 839 quru metrik ton təşkil edib. Bu, 2019-cu ilin yekunlarının göstəriciləri ilə müqayisədə 1 558 quru metrik ton və ya 15,2 % çoxdur.

2020-ci maliyyə ilində müştəriyə şirkət tərəfindən mis konsentratının tədarükünün satış dəyəri 17,7 milyon ABŞ dolları (Azərbaycan Hökuməti istehsal payı xaricində) təşkil edib. Bu isə daha əvvəlki 2019-cu ilin göstəriciləri ilə müqayisədə 1 milyon ABŞ dolları və ya 6 % çoxdur.

Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51 %, "Anglo-Asian Mining Plc." şirkətinin payı 49 % təşkil edir. İlk qızıl hasilatına ("Gədəbəy" yatağında) 2009-cu ildə başlanılıb. “Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Qadir” və “Gədəbəy” yatağından 50 km aralıdakı “Qoşa” yeraltı mədənində, yeni kəşf olunan "Uğur" yatağında da hasilatla məşğuldur.