Azərbaycanda 2026-cı ilə qədər karbamid istehsalı layihə gücünə çatdırılacaq

2022-ci ildə Azərbaycanda 455 min ton karbamidin istehsal edilməsi nəzərdə tutulur.

"Report"un xəbərinə görə, bu barədə "2022-ci il dövlət büdcəsi zərfi haqqında” qanun layihəsində qeyd edilib.

Sənədə əsasən, 2023-cü ildə 617,5 min ton karbamid istehsal edilməsi proqnozlaşdırılır. Bu, 2022-ci ilin göstəriciləri ilə müqayisədə 162,5 min ton və ya 35,7 % çoxdur.

2024-cü ildə isə 650 min ton karbamid istehsal edilməsi proqnozlaşdırılır ki, bu da 2023-cü ilin proqnozu ilə müqayisədə 32,5 min ton və ya 5,26 % çoxdur.

2025-ci ildə də 650 min ton karbamid istehsal edilməsi proqnozlaşdırılır ki, bu 2024-cü ilin göstəricisi ilə eyni olsa da, 2022-ci ilin yekunlarının proqnozu ilə müqayisədə 195 min ton və ya 42,8 % çoxdur.

Qeyd edək ki, Sumqayıt Kimya Sənaye Parkında inşa edilən SOCAR-ın Karbamid Zavodu 2019-cu ilin yanvarın 16-da istifadəyə verilib. Zavod ildə 650-660 min ton karbamid istehsal etmək gücündədir. İstehsal həcminin, təqribən, 70 %-i ixrac üçün nəzərdə tutulub ki, bu da ölkəyə illik 160 milyon ABŞ dollara qədər həcmdə əlavə gəlirin daxil olmasına imkan verəcək.

Karbamid Zavodu hazırda ölkənin qeyri-neft sektorunda reallaşdırılan ən iri layihədir, onun ümumi dəyəri, təqribən, 800 milyon avro təşkil edir. 2019-cu ilin mayın 25-də Karbamid Zavodundan kütləvi olaraq Azərbaycan karbamidinin ilk tədarükü başlayıb. Karbamid Zavodunda maşınlara yüklənir və gəmilərə yüklənmək üçün Hövsan beynəlxalq limanına göndərilir.