İnsult keçirən Milli Qəhrəman Əlillərin Bərpa Mərkəzinə köçürülüb, səhhətində irəliləyiş var

“Hazırda səhhətim normaldır və müalicəmi Əmək və Əhalinin Sosial Müdafiəsi Nazirliyinin Respublika Əlillərin Bərpa Mərkəzində davam etdirirəm”.

Bunu “Report”a açıqlamasında Ukraynanın Kiyev şəhərində insult keçirən Azərbaycanın Milli Qəhrəmanı Zabit Quliyev deyib.

O bildirib ki, əvvəlki günlərə nisbətən səhhətində irəliləyiş var: “Burada 21 gün müalicə kursu keçəcəm. Onun bir həftəsi geridə qalıb. Əsasən fizioterapiya müalicəsi alıram. Buranın həkimləri deyir ki, sonrakı müddətdə vəziyyətim daha da yaxşı olacaq. Hələlik özüm-özümü tam idarə edə bilmirəm. Sol tərəfim demək olar ki, işləmir. Sadəcə ayağım bir az hərəkətlidir. Yanımda kimsə olmasa sərbəst gəzə bilmirəm”.

Z.Quliyev Ukraynada aldığı müalicədən razılıq edib: “Cənab Prezident İlham Əliyevin diqqət və qayğısı nəticəsində Ukraynada olarkən yüksək səviyyədə müalicə kursu keçdim. Amma müalicəm burada hələlik o səviyyədə deyil. Bununla əlaqədar Səhiyyə Nazirliyinə məktub ünvanlayacağıq”.

Qeyd edək ki, tədbirlərdə iştirak etmək üçün Kiyevə gedən Z.Quliyevin səhhəti mayın 9-da qəflətən pisləşib. O, dərhal xəstəxanaya yerləşdirilib. Milli Qəhrəmanın müalicəsi Azərbaycan Prezidenti İlham Əliyevin birbaşa tapşırığı əsasında ciddi nəzarətə götürülüb. Mayın 11-də o, A.P.Romodanova adına Neyro-Cərrahiyə İnstitutuna yerləşdirilib.

Z.Quliyev mayın sonunda Azərbaycana qayıdıb və müalicəsini Respublika Neyrocərrahiyyə Xəstəxanasında  7-8 gün davam etdirib.