Yuxarı

Bakıda həkimlər 650 qram çəki ilə dünyaya gələn körpənin yaşamasına nail olub - FOTO

İndi Yusifin çəkisi 1020 qramı keçib

Bakı. 23 iyul. REPORT.AZ/ 23 həftəlik, 650 qram çəki ilə yenidoğulanın həyatda saxlanılması Azərbaycanda ilk dəfə olaraq Azərbaycan Tibb  Universitinin (ATU) Tədris Cərrahiyyə Klinikasında gerçəkləşdirilib. Bu barədə "Report"a ATU-nun mətbuat xidmətindən məlumat verilib. 

Son bir ayda hər kəsin diqqəti bir ay öncə 23 həftəlik, 650 qram çəki ilə dünyaya göz açan Yusifin üzərindədir. Belə ki, bu il iyunun 19-da 23 həftəlik hamiləliklə körpəsini itirmə təhlükəsi ilə ümidsiz şəkildə hamilə qadın ATU-nun Tədris Cərrahiyyə Klinikasına müraciət edib. 

Aparılan müayinələr zamanı dölyani mayenin tam axdığı aşkar edilib. Bundan çıxış yolu isə ancaq hamiləliyin sona çatdırılması olub. Klinikanın həkim mama-ginekoloqu Nigar Abbasova və həkim-neonatoloqu Səadət Yaqubovanın apardığı müayinələr nəticəsində dölün həyat fəaliyyətinin davam etdiyi aşkar edilib və süni doğuş aparılıb. 

Həkimin sözlərinə görə, yenidoğulanın çəkisi 650 qr, ümumi vəziyyəti isə kritik idi: "Dərin morfofunksional çatışmazlıq fonunda uşaqda tənəffüs pozğunluğu əlaməti ön planda idi. Respirator distress sindromu müşahidə olunurdu. Bütün xəstəxana yaşama ehtimalı çox aşağı olan körpənin həyat mücadiləsində ona dəstək olaraq, onu həyatda saxlamağa nail oldular".

Neonatologiya şöbəsinin müdiri Səadət Yaqubovanın rəhbərliyi ilə aparılan reanimasiya tədbirləri nəticəsində körpə artıq 33 gündür ki yaşayır. Vəziyyəti bu müddət ərzində bir neçə dəfə kəskin pisləşsə də, hazırda qənaətbəxşdir. İndi Yusifin çəkisi 1020 qramı keçib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi