Qəhvənin gözlənilməz təhlükəsi məlum olub

Avstraliya Katolik Universitetinin alimləri müəyyən ediblər ki, yatmazdan 12 saat əvvəl yüksək dozada kofein qəbul etmək gecə istirahətinin keyfiyyətini azalda bilər. Ancaq bu təsir insanlar tərəfindən diqqətdən kənarda qala bilər.

“Report” xəbər verir ki, araşdırmanın nəticələri “Sleep” jurnalında dərc olunub.

Araşdırmada 18-40 yaş arası 23 kişi iştirak edib. Bütün könüllülər mütəmadi olaraq orta dozada (gündə 300 mq-dan az) kofein istehlak ediblər. Təcrübənin bir hissəsi olaraq, subyektlərdən yatmadan 12, səkkiz və dörd saat əvvəl (müxtəlif günlərdə) 100 və 400 mq kofein qəbul etmələri istənilib.

Nəticələr göstərib ki, yüksək dozada kofein, xüsusən də 400 mq, hətta yatmadan 12 saat əvvəl qəbul edilsə belə, yuxunu poza bilər. Yatmadan dörd saat əvvəl qəbul edilən 100 mq kofein gecə istirahətinə praktiki olaraq heç bir təsir göstərməyib.

Alimlər qeyd ediblər ki, eksperiment iştirakçıları çox vaxt kofeinin yuxuya təsirini hiss etməyiblər, baxmayaraq ki, xüsusi yuxu monitorinq cihazının polisomnoqrafiya məlumatlarında onun keyfiyyətinin pisləşməsi müşahidə olunub.

Maraqlıdır ki, iştirakçılar evdə kofein qəbul ediblər. Bu səbəbdən yuxu keyfiyyətinin azalması ətraf mühitin dəyişməsi ilə izah edilə bilməz.