DGK-nın Tibbi Xidmət İdarəsində təyinat olub

Dövlət Gömrük Komitəsi (DGK) Tibbi Xidmət İdarəsinin Sanitar Karantin Xidmət İdarəsinə yeni rəis təyin olunub.

“Report” xəbər verir ki, bu vəzifəyə Surxay Məmmədov gətirilib.

DGK-nın Tibbi Xidmət İdarəsinin rəis müavini Şahlar Mirqasım onu kollektivə təqdim edib.

Qeyd edək ki, S.Məmmədov 1995-2000-ci illərdə Azərbaycan Tibb Universitetinin Tibbi profilaktika fakültəsində təhsil alıb. 2001-2005-ci illərdə Müdafiə Nazirliyinin Sanitar Epidemioloji Nəzarət Mərkəzində həkim mütəxəssis kimi, həmin mərkəzdə 2005-2012-ci illərdə xüsusi təhlükəli bakterial infeksiyalar bölməsinin rəisi kimi, 2012-2013-cü illərdə Tibbi profilaktika şöbəsinin zabiti kimi, 2013-2016-cı illərdə baş zabit kimi, 2016-cı ildə isə rəis müavini kimi fəaliyyət göstərib. 2015-ci ildə tibb üzrə fəlsəfə doktoru adını qazanıb.

S.Məmmədov 2016-2019-cu illərdə Azərbaycan Tibb Universitetinin Hərbi tibb fakültəsinin Tibbi profilaktika kafedrasının baş müəllimi kimi, 2019-2021-ci illərdə Azərbaycan Ordusunun baş sanitar həkimi, 2022-ci ildə İcbari Tibbi Sığorta üzrə Dövlət Agentliyinin Müharibə iştirakçıları ilə koordinasiya departamentinin Qərb bölgəsi ilə iş şöbəsinin müdiri, 2022-2023-cü illərdə Səhiyyə Nazirliyi Respublika Gigiyena və Epidemiologiya Mərkəzinin baş direktor müavini vəzifəsində çalışıb.