Bağırsaq bakteriyaları insan qərarlarına təsir edirmiş

Paris Beyin İnstitutundan və Bonn Universitetindən olan fransız alimləri müəyyən ediblər ki, bağırsaq mikrobiotasında dəyişikliklər ədalətə qarşı həssaslığa və insanların bir-birinə münasibətinə təsir edə bilər.

“Report” xəbər verir ki, araşdırma “PNAS Nexus” elmi jurnalında dərc olunub.

Bağırsaq mikrobiotası həzm sistemindəki bakteriya, virus və göbələklərdən ibarətdir. Son tədqiqatlar onun tərkibi ilə idrak funksiyası, stress səviyyələri, narahatlıq və depressiya əlamətləri arasında əlaqəni ortaya qoyub.

Yeni araşdırmada 101 nəfər iştirak edib. Onların yarısı yeddi həftə ərzində faydalı bakteriyalar və mikrobiota qidaları (probiyotiklər və prebiyotiklər) olan əlavələr qəbul edib. Digər yarısı plasebo qəbul edib.

Bundan sonra iştirakçılardan cütlərə bölünərək oyun oynamağı xahiş ediblər. Oyun zamanı oyunçulardan biri özbaşına pul məbləğini bölmək hüququ əldə edib, ikincisi isə təklif olunan hissə ilə razılaşmaq və ya imtina etmək hüququna sahib olub. Lakin ikinci şəxs imtina edərsə, o zaman bütün pullar yandırılıb.

Məlum olub ki, faydalı bağırsaq bakteriyaları qəbul edən insanlar plasebo qrupu ilə müqayisədə daha az rasional hərəkət edir və ədalətsiz pul bölgüsü ilə razılaşmırlar. Tədqiqatçılar həmçinin probiyotiklər və prebiyotiklər qəbul edənlərdə tirozin səviyyələrində kəskin azalma müşahidə ediblər. Alimlərin fikrincə, bu, bağırsaq mikroblarının insan qərarlarına təsir mexanizmini izah edə bilər.