- Azərbaycanda koronavirus epidemiyası ilə bağlı vəziyyət necədir? Hər hansı şübhəli fakt qeydə alınıbmı?
- Ölkədə vəziyyət sabitdir, heç bir şübhəli hal yoxdur. Buna baxmayaraq, koronavirusa qarşı profilaktik tədbirlər həyata keçirilir. Çindən gələn vətəndaşlarımız və əcnəbilər tibbi müşahidədə saxlanılırlar. Bir sözlə, bütün lazımi tədbirlər görülür.
- Virusdan qorunmaq üçün qoruyucu maskalardan istifadə nə qədər effektlidir?
- Qoruyucu maskalardan istifadənin üstünlüyü xəstə şəxsin başqasını virusa yoluxdurmaması, eyni zamanda onun sağlamlığını qoruması deməkdir. Yeni virus hava-damcı infeksiyasıdır. Deməli, insan öskürəndə və ya asqıranda bu ifraz olunur. Ona görə tövsiyə olunur ki, qoruyucu maskalardan istifadə edilsin.
- Bir çox ölkədə hazırda qoruyucu maskalara təlabat artıb və qıtlıq yaranıb. Azərbaycanda bu sahədə vəziyyət necədir? Maska qıtlığı varmı?
- Bu gün üçün Azərbaycanda qoruyucu maska baxımından hər hansı qıtlıq müşahidə olunmur. Ölkədə kifayət qədər qoruyucu maska var. Hələlik təşviş yoxdur, ona görə də kütləvi şəkildə maska almaq halı mövcud deyil.
- Azərbaycanda yaşayan və işləyən Çin vətəndaşları ilə ünsiyyətin hər hansı riski varmı?
- Onlarla ünsiyyətin heç bir riski yoxdur. Əgər bizim vətəndaş koronavirusun sürətlə yayıldığı Çinin Uhan şəhərindən gəlibsə, o daha risklidir, nəinki uzun müddətdir Çində olmayan və Azərbaycanda yaşayan şəxslər. Ona görə də Azərbaycanda olan çinlilərlə ünsiyyət heç bir təhlükə yaratmır.
- İnsanlar hansı halda həkimə müraciət etməlidir?
- İnsan səhhətində hər hansı problem yaranan kimi həkimə müraciət etməlidir. Hərarət qalxırsa və digər əlamətlər olsa, deməli, bədəndə hansısa proseslər gedir. Həkim də həmin şəxsi düzgün istiqamətləndirəcək.
- Azərbaycanda koronavirus şübhəsi olan xəstələri aşkarlamaq üçün ölkəyə gətirilən testlərdən istifadə olunurmu?
- Həm müalicədə, həm profilaktikada, həm də diaqnostikada göstəriş olmalıdır ki, hansı halda hansı tədbirlər görülməlidir. Odur ki, bu sahədə bütün lazımi addımlar atılır.