Alimlər soyuğun insan orqanizmi üçün faydalarını açıqlayıblar

Onilliklər ərzində aparılan tədqiqatlar göstərir ki, müxtəlif formalarda soyuqlara məruz qalma ürək, immunitet sistemi və dəri üçün faydalı ola bilər.

"Report"un məlumatına görə, bu barədə "Daily Mail" məlumat yayıb.

Britaniyanın Birmingem Universitetinin alimləri bildiriblər ki, soyuq havada məşq etmək ürəyi gücləndirə və kəskin respirator virus infeksiyaları riskini azalda bilər. Bundan əlavə, bu cür məşqlər çox kalori tələb edir, çünki bədən eyni zamanda temperaturu saxlamalıdır. Bunun üçün bədən qan dövranını artırmağa məcbur olur, həmin səbəbdən də ürək daha çox işləyir. Həmçinin, soyuqda məşq etmək immunitet sisteminin viruslarla daha yaxşı mübarizə aparmasına kömək edir və kəskin respirator virus infeksiyaları riskini azaldır.

Tədqiqatlar göstərir ki, məşq antidepresanlardan dörd dəfə daha təsirli ola bilər. Qışda çöldə idman etmək, xüsusilə mövsümi affektiv pozğunluq üçün faydalı olan endorfinlərin sərbəst buraxılmasını asanlaşdıra bilər.

Nəhayət, açıq havada məşq etmək qanda D vitamini səviyyəsini artırmağa kömək edir ki, bu da daha yaxşı dəri keyfiyyəti ilə əlaqələndirilir. Bundan əlavə, soyuq su ilə yuyulma və ya soyuq suya daldırma qan damarlarını daraldır, məsamələri və qızartıları azaldır, şişkinliyi, iltihabı azaltmaqla əzələ ağrısını, gərginliyini aradan qaldırır. Lakin soyuq su müalicəsinin faydalarına dair sübutlar azdır və kiçik tədqiqatlara və ya insan təcrübəsinə əsaslanır. Portsmut Universitetinin mütəxəssisləri xəbərdarlıq edirlər ki, suya enmə ehtiyatlılıq tələb edir, çünki effektiv və təhlükəsiz dalğıc parametrləri hələ məlum deyil.