Tbilisidə kənd təsərrüfatı torpaqlarının əcnəbilərə satılmasına etiraz olaraq aksiya keçirilib

Tbilisi. 10 dekabr. REPORT.AZ/ Tbilisidə Ədliyyə Evinin binası qarşısında kənd təsərrüfatı torpaqlarının xarici vətəndaşlara satılmasına etiraz olaraq aksiya keçirilib.

“Report”un Gürcüstan bürosu xəbər verir ki, aksiyanı “Gürcü marşı” radikal millətçi hərəkatı təşkil edib.

Etirazçılar Konstitusiya Məhkəməsinin ötən həftə qəbul etdiyi qərara etiraz edərək bunun antixalq xarakterli olduğunu bildiriblər. Onlar Ədliyyə Evinə daxil olmağa cəhd göstərsələr də, mühafizəçilər bunun qarşısını alıb.

Aksiyaya bəzi siyasi partiyaların nümayəndələri də qoşulub.

Qeyd edək ki, dekabrın 7-də Gürcüstanın Konstitusiya Məhkəməsi ölkədə xarici vətəndaşlara kənd təsərrüfatı torpaqlarının satışına qoyulmuş moratoriumu dekabrın 16-na qədər müvəqqəti ləğv edib. Həmin gün yeni prezidentin andiçmə mərasimindən sonra kənd təsərrüfatı torpaqlarının xarici vətəndaşlara satılmasının tam qadağan olunmasını nəzərdə tutan yeni konstitusiya qüvvəyə minəcək.