Ekspert: "Rusiyanın "Tu-154" təyyarəsinin qəzaya uğraması ilə bağlı yoxlanılmalı olan üç komponent var"

Moskva. 26 dekabr. REPORT.AZ/ "Rusiyanın "Tu-154" təyyarəsinin Qara dəniz üzərində qəzaya uğraması ilə bağlı ilk növbədə yoxlanılmalı olan üç komponent var - təyyarənin uçuşa yararlılığının vəziyyəti, xidmət personalı və uçuş heyətinin öz vəziyyəti".

Bunu "Report"un Moskva müxbirinə açıqlamasında Beynəlxalq Mülki Aviasiya Təşkilatının (ICAO) mütəxəssisi, Rusiya Dövlət Dumasının Nəqliyyat Komitəsinin eksperti Vitali Bordunov deyib.

"Bu gün üçün nəyisə iddia eləmək çətindir. Qara qutunun dinlənməsi çox şeyə aydınlıq gətirəcək" -  V.Bordunov bildirib. O, istintaqın yekunlaşmasının gözləmək lazım olduğunu vurğulayıb: "Beynəlxalq aviasiya işinin əsas prinsiplərini müəyyən edən Çikaqo Konvensiyasında belə göstərilir. Həmişə hansısa iz qalır və doğru istintaq nəticəsində qısa zamanda hər şeyə aydınlıq gələcək."

Ekspert hərbi təyyarəyə mülki hava limanında yanacaq doldurulması faktının şübhə doğurduğunu qeyd edib və fikrini həmin yerlərdə hərbi aerodromların da olması ilə izah edib: "Xüsusi reysin Müdafiə Nazirliyi tərəfindən nəzarət edilən ərazidə yanacaqla doldurulması məntiqli olardı."

V.Bordunov həmçinin indiyə qədər Rusiyada aerodromlar haqqında qanunun və bu sahə üzrə digər mühüm qaydaların tənzimlənmədiyini vurğulayıb.

Xatırladaq ki, dünən səhər saatlarında Suriyaya istiqamət alan Rusiya Müdafiə Nazirliyinə məxsus "Tu-154" təyyarəsi Qara dənizin üzərindən uçarkən qəzaya uğrayıb. Nazirliyin məlumatına görə, təyyarənin göyərtəsində 92 nəfər - 8 ekipaj üzvü və 84 sərnişin olub. Sərnişinlər arasında 8 hərbçi, Aleksandrov adına hərbi ansamblın 64 artisti, Rusiya telekanallarının 9 əməkdaşı, "Ədalətli yardım" xeyriyyə fondunun rəhbəri Yelizaveta Qlinka və iki federal məmur olub. Qəza ilə bağlı cinayət işi başlanılıb.