​ABŞ Mərkəzi Kəşfiyyat İdarəsinin keçmiş məsul məmuru "Taliban", İŞİD, "əl-Qaidə" ilə bağlı açıqlama verib

Bakı. 12 aprel. REPORT.AZ/ "İŞİD-i tamamilə Mərkəzi Kəşfiyyat İdarəsi (MKİ) yaratmasa da, bu terrorçu qruplaşma onun maraqlarına xidmət edir".

"Report" Türkiyə KİV-inə istinadən xəbər verir ki, bunu ABŞ Mərkəzi Kəşfiyyat İdarəsinin (MKİ) keçmiş məsul şəxslərindən Elizabet Mürrey "ahaber" telekanalında yayımlanan "Yaz-Boz" proqramında çıxışı zamanı bildirib.

"İŞİD-i bütövlükdə MKİ-nin yaratdığını deyə bilmərəm. Ancaq o, MKİ-nin maraqlarına xidmət edir. Bu işdə İsrailin də əli var. Kürdlərlə bağlı məsələyə Türkiyə qərar verməlidir. Xarici kəşfiyyat təşkilatlarının prosesə müdaxilə etməsinə icazə verməməliyik. Terrorçuları bir-bir öldürməklə terrorun kökünü kəsmək olmaz. Bu bataqlığı qurutmaq, onlara silah-sursat dəstəyini kəsmək lazımdır. Mən PKK və "YPG"-yə (terrorçu PKK qruplaşmasının Suriyadakı qolu- "Report") silah verilməsinə embarqo qoyulması tərəfdarıyam", - deyə o vurğulayıb.

ABŞ və Avropa KİV-dəki Türkiyə, onun prezidenti Rəcəb Tayyib Ərdoğanın əleyhidarlarına münasibət bildirən MKİ-nin keçmiş məsul məmuru deyib: "Qərb mediası öz ölkələrindəki problemləri görməyib, Türkiyə və Ərdoğanla məşğul olması mənə çox gülməli görünür".

Onun sözlərinə görə, Orta Şərqdə qarışıqlığı yaradan ABŞ-dakı dərin dövlət və silah tacirləridir: "Bölgədəki qarışıqlıqdan daha çox silah baronları qazanır".

O, ABŞ-ın 1970-ci ildə "Taliban"a təlim verməsini, "Əl-Qaidə"nin qurulmasına yardım etdiyini də söyləyib.