Zelenski: Sumı vilayətinə 200-ə yaxın idarəolunan aviabomba atılıb

Sadəcə mart ayı ərzində Ukraynanın şimal-şərqində yerləşən Sumı vilayətinə 200-ə yaxın idarəolunan aviabomba atılıb.

“Report” xəbər verir ki, bu barədə Ukrayna Prezidenti Volodimir Zelenski ənənəvi axşam videomüraciətində deyib.

Onun sözlərinə görə, Rusiya ordusu Ukraynanın “sərhədyanı kəndlərini yandırıb viran qoymağa çalışır”:

“Bu martın əvvəlindən bu günədək Rusiya aviasiyası təkcə Sumı bölgəsindəki icmalara 200-ə yaxın idarəolunan bomba atıb. Düz kəndlərə, şəhərlərə, mülki infrastruktura”.

Dövlət başçısı vurğulayıb ki, işğalçı qüvvələrin atəşlərini dayandırmaq üçün Ukraynanın hava hücumundan müdafiəsini gücləndirmək lazımdır. Bunu Sumı, Çernihiv, Xarkov, Donetsk, Luqansk vilayətləri, habelə cənub regionlarında etmək vacibdir.

“Lazımi silahlara malik olan böyük ölkələrin həyatın qorunmasında da həqiqətən böyük olması vacibdir - bu silahları anbarlarda və ya anbarlarda hardasa saxlamamalıdır, “Patriot” və digərləri insanların həyatlarını xilas etməyə yaramalıdır”, – Zelenski söyləyib.

Xatırladaq ki, Rusiya Silahlı Qüvvələri sistematik şəkildə Sumı vilayətini atəşə tutsa da, son vaxtlar bu hücumların kəsəri artıb. Martın 14-də Sumı vilayət dövlət administrasiyasının sədri Volodimir Artüx iki gündə regionun 800 dəfə atəşə tutulduğunu bildirərək belə sayın ötən il sadəcə ilyarım ərzində qeydə alındığını vurğulayıb.