Paşinyan: Ermənistan Azərbaycanla sərhədin delimitasiyasının davam etdirilməsinə ümid edir - YENİLƏNİB

Ermənistan tərəfi Azərbaycanla delimitasiya və demarkasiya işlərinin davam etdirilməsinə ümid edir.

“Report” xəbər verir ki, bunu ölkənin baş naziri Nikol Paşinyan “Armenpress”ə müsahibəsində bildirib.

"Yanvarda görüş planlaşdırılır. 2024-cü ildəki demarkasiya üzrə müsbət təcrübə sakit, iş şəraitində inkişaf etdirilməlidir. Biz belə işə köklənmişik", - o qeyd edib.

Yaxın vaxtlarda Ermənistan və Azərbaycan arasında sərhədlərin demarkasiyası üzrə komissiyaların görüşü keçiriləcək.

“Report” erməni KİV-lərinə istinadən xəbər verir ki, bu barədə Ermənistanın baş nazirinin müavini Mqer Qriqoryanın Aparatı məlumat yayıb.

Məlumatda qeyd olunur ki, konkret tarix barədə hələlik razılıq əldə olunmayıb.

Qeyd edək ki, Prezident İlham Əliyev yanvarın 7-də yerli televiziya kanallarına müsahibəsində də bildirib ki, bu ay delimitasiya üzrə Azərbaycan və Ermənistan komissiyalarının növbəti görüşü olmalıdır: “Bildiyim kimi, bu ay, hər halda bizim təşəbbüsümüzlə, təklifimizlə delimitasiya məsələsini davam etdirmək üçün delimitasiya üzrə Azərbaycan və Ermənistan komissiyalarının növbəti görüşü olmalıdır”.