Ukrayna XİN başçısı: "Taxılımızın beynəlxalq bazara ixracı üçün iki addım qalıb"

“Ukrayna taxılının beynəlxalq bazara ixracına dair razılaşma üçün iki addım qalıb. Hələlik Rusiyanın mövqeyi ilə bağlı təhlükəsizlik problemlərini həll etmək lazımdır”.

“Report” “RBK Ukraina”ya istinadən xəbər verir ki, bunu Ukraynanın xarici işlər naziri Dmitro Kuleba “El Pais” nəşrinə müsahibəsində deyib.

“Biz son mərhələdəyik. İndi hər şey Rusiyadan asılıdır. Həqiqətən, bunu istəsələr, tezliklə taxıl ixracına başlaya bilərik. Yox, əgər Moskva bu məsələdən aclıq oyunlarını davam etdirmək üçün yararlansa, danışıqların vacibliyində israr etməyə davam edəcəkl", - nazir vurğulayıb.

D.Kulebanın sözlərinə görə, Ukrayna öz taxılını beynəlxalq bazara çıxarmağa hazırdır. Eyni zamanda, nazir vurğulayıb ki, Rusiya Ukraynanın taxılını ixrac etməsində maraqlı deyil: “Çünki bilirlər ki, biz taxıl ixracına başlasaq, beynəlxalq bazarlardan gəlir əldə edəcəyik. Bu, bizi daha güclü edəcək”.

Xatırladaq ki, bu gün Türkiyədə Ukrayna taxılının dünya bazarına təhlükəsiz çıxarılması ilə bağlı danışıqlar aparılacaq.