Samarada trolleybus yanıb, 25 sərnişin təxliyə olunub

Rusiyanın Samara şəhərində 25 sərnişini daşıyan trolleybus yanıb.

“Report” xəbər verir ki, bu barədə Rusiya Fövqəladə Hallar Nazirliyinin Samara vilayəti üzrə Baş İdarəsi məlumat yayıb.

“Saat 06:33-də Samara şəhəri, Moskovskoe şosse, 185a ünvanında hərəkətdə olan trolleybusda (12 nömrəli marşrut) yanğın baş verməsi barədə məlumat daxil olub. Trolleybusda 25 nəfər olub, onlar özləri təxliyə olunub”, - məlumatda deyilir.

Yanğın yanğınsöndürənlər və xilasedicilər gələnə qədər söndürülüb, hadisə zamanı xəsarət alan olmayıb.