Rusiya hakimiyyəti müxalif jurnalisti axtarışa verib

Rusiyalı jurnalist Arkadi Babçenko axtarışa verilib.

“Report” TASS-a istinadən xəbər verir ki, bu barədə ölkənin Daxili İşlər Nazirliyindən bildirilib.

Onun barəsində hansı maddə ilə cinayət işi açıldığı açıqlanmayıb.

Amma jurnalist ekstremistlər siyahısına əlavə edilib.

Xatırladaq ki, 1977-ci il təvəllüdlü A.Babçenko “Moskovski Komsomoltsk” və “Novaya qazeta” nəşrlərində hərbi müxbir kimi çalışıb. O, 2017-ci ildən Ukraynaya köçüb.

2018-ci ildə jurnalistin Kiyevdə öldürülməsi barədə məlumatlar yayılsa da, sonradan bunun jurnalistə ehtimal edilən sui-qəsdin qarşısını almaq üçün yayıldığı məlum olub.

A.Babçenko sui-qəsdin hazırlanmasında Rusiya xüsusi xidmət orqanlarını ittiham edib.

2019-cu ilin noyabrında A.Babçenko Ukraynanı tərk edib.