Reznikov Ukraynanın 2024-cü ildə NATO-ya üzv olacağına ümid edir

Ukrayna gələn il ABŞ-nin paytaxtı Vaşinqtonda keçiriləcək NATO sammitində Alyansa qoşula bilər.

“Report” xəbər verir ki, bu fərziyyəni Ukraynanın müdafiə naziri Oleksiy Reznikov CNN-ə müsahibəsində irəli sürüb.

“Kim bilir, bəlkə də bu, Ukrayna üçün çox vacib bir gün olacaq. Bu, sadəcə mənim proqnozumdur”, - müdafiə naziri telekanala bildirib.

Nazir 5-ci maddəyə istinad edərək Ukraynanın yalnız müharibə başa çatdıqdan sonra Alyansa qoşula biləcəyini etiraf edib. Savaşın gələn yayadək bitib-bitməyəcəyi ilə bağlı sualına onun cavabı konkret olub: “Bəli. Biz bu müharibədə qalib gələcəyik”.

Müdafiə nazirinin sözlərinə görə, Ukraynanın Rusiya ilə mübarizəsini nəzərə alsaq, onun NATO-ya daxil olmasının faydaları yalnız artıb.

“Qələbədən sonra bu, NATO-nun maraqlarına uyğun olacaq, çünki biz NATO-nun əsl şərq qalxanı və ya Avropanın şərq qalxanı olduq”, - Reznikov vurğulayıb.