Qriqoryan: Transmilli cinayətkarlıqla mübarizədə MDB ölkələri arasında qarşılıqlı fəaliyyət vacibdir

Transmilli cinayət bu gün MDB ölkələrinin hüquq-mühafizə orqanlarının böyük problemidir.

“Report” Ermənistan mətbuatına istinadən xəbər verir ki, bunu ölkənin baş nazirinin müavini Mher Qriqoryan MDB-yə üzv dövlətlərin Baş Prokurorlarının Koordinasiya Şurasının İrəvanda keçirilən 34-cü iclasında deyib.

Onun sözlərinə görə, miqyası bir dövlətin hüdudlarından kənara çıxan gizli və əlaqələndirilmiş cinayət beynəlxalq hüquqi əməkdaşlıqda yeni keyfiyyət tələb edir.

Baş nazirin müavini qeyd edib ki, MDB dövlətləri arasında çoxşaxəli əməkdaşlıq həyat fəaliyyətinin müxtəlif sahələrini, o cümlədən cinayətkarlıqla mübarizəni əhatə edir. Cinayətkarlıqla mübarizədə (xüsusilə mütəşəkkil və transmilli) hüquq-mühafizə orqanları arasında daimi və konstruktiv əməkdaşlıq böyük əhəmiyyət kəsb edir.

Baş Prokurorların Koordinasiya Şurasının iclası son 17 ildə ilk dəfədir ki, Ermənistanda keçirilir. İclasın gündəliyinə 10 məsələ daxildir. İclasdan sonra 2025-ci il üçün Şuranın sədri seçiləcək.