Mixeil Saakaşvilinin xəstəxanaya yerləşdirilməsi xəbəri təkzib olunub

Gürcüstanın eks-prezidenti Mixeil Saakaşvilinin cəzaçəkmə müəssisəsindən xəstəxanaya köçürülməsi barədə yayılan xəbər təkzib olunub.

“Report”un yerli bürosu xəbər verir ki, Gürcüstanın Xüsusi Penitensiar Xidmətindən informasiyanın həqiqətə uyğun olmadığı bildirilib.

Qeyd edilib ki, Rustavidəki 12 saylı həbsxanada saxlanılan başqa məhbusun xəstəxanaya köçürülməsinə ehtiyac yaranıb. 

Gürcüstanın keçmiş prezidenti Mixeil Saakaşvili xəstəxanaya yerləşdirilib.

“Report”un yerli bürosu xəbər verir ki, bu barədə “Mtavari” telekanalı məlumat yayıb.

Məlumata əsasən, sabiq dövlət başçısı Rustavi şəhərində saxlanıldığı 12 saylı cəzaçəkmə müəssisəsindən Tbilisidəki Respublika xəstəxanasına köçürülüb.

M.Saakaşvilinin həbsxanadan klinikaya köçürülməsi ilə bağlı rəsmi açıqlama hələ verilməyib.

Qeyd edək ki, eks-prezidentin sağlamlıq durumunun ağır olduğu və çətinliklə yeridiyi bildirilir. Yaxınları siyasətçinin müalicə üçün xaricə göndərilməsini tələb edirlər. Bu tələblə Tbilisi, Batumi və Rustavi şəhərlərində aksiyalar keçirilib.

Xatırladaq ki, M.Saakaşvili ötən ilin sentyabrın 28-də Gürcüstana gizli yolla daxil olub və oktyabrın 1-də Tbilisidə yaxalanıb.