Kobaxidze Tbilisidəki etirazçıları qanunu pozmaqdan və zorakılıqdan çəkinməyə çağırıb

Sabah parlament əhalinin əksəriyyətinin iradəsinə uyğun hərəkət edəcək və “Xarici təsirin şəffaflığı haqqında” qanunu üçüncü oxunuşda təsdiqləyəcək.

"Report"un yerli bürosu xəbər verir ki, bu sözləri Gürcüstanın Baş naziri İrakli Kobaxidze keçirdiyi brifinqdə deyib.

O, xatırladıb ki, apreldə keçirilən sorğunun nəticələrinə görə, əhalinin 80%-dən çoxu qeyri-hökumət təşkilatlarının fəaliyyətinin şəffaflığını, 60%-dən çoxu isə “Xarici təsirin şəffaflığı haqqında” qanunu dəstəkləyir.

İ.Kobaxidze həmçinin etirazçıları qanunu pozmaqdan və zorakılıqdan çəkinməyə çağırıb. Eləcə də hüquq-mühafizə orqanlarının əməkdaşlarına nümayişçilərin hər hansı zorakılıq təzahürünə maksimum səbirlə cavab verməyi tapşırıb.