Ermənistanda müdafiə nazirinin müşavirinin işdən çıxarıldığı təsdiqlənib - YENİLƏNİB

Ermənistan Müdafiə Nazirliyi general-mayor Artak Tonoyanın nazir müşaviri vəzifəsindən azad edilməsi barədə məlumatı təsdiqləyib.

“Report” Ermənistan KİV-inə istinadən xəbər verir ki, bu barədə qurumun mətbuat katibi Aram Torosyan bildirib.

"General-mayor Artak Tonoyan uzun müddət hərbi xidmətdə olması və təqaüdə çıxması ilə əlaqədar öz ərizəsi ilə Ermənistan Silahlı Qüvvələrinin ehtiyatına buraxılıb", - o qeyd edib.

Xatırladaq ki, daha əvvəl KİV-də onun oğlu Artaşes Tonoyanın həbs edilməsi barədə məlumat yayılmışdı. Onun adı avqustun 15-də kriminal avtoritet Rustam Stepanyanın evi yaxınlığında güllələnən 24 yaşlı D.Mamikonun qətli ilə bağlı cinayət işində hallanır.

Hüquq-mühafizə orqanları tərəfindən üç şübhəli şəxsi saxlanılıb, onlardan biri də Artaşes Tonoyandır.

15:33

Ermənistan müdafiə nazirinin müşaviri general-mayor Artak Tonoyan tutduğu vəzifədən azad olunması barədə ərizə verib.

Bu barədə “Report” “24news.am”ə istinadən xəbər verir.

Bu addımın səbəbləri açıqlanmır, lakin qeyd olunur ki, daha əvvəl KİV-də Tonoyanın oğlunun qətl ittihamı ilə həbs olunduğu barədə məlumat yayılmışdı.