Hatayda baş vermiş zəlzələ nəticəsində dağılan “Renessans Residence”in memarı saxlanılıb

Türkiyənin Hatay vilayətinin Antakya şəhərində yerləşən, zəlzələ nəticəsində dağılan “Renessans Residence”in memarı Mehmet Yaşar Coşkun xaricə qaçmağa çalışan zaman saxlanılıb.

“Report” xəbər verir ki, bu barədə Türkiyə KİV-ləri məlumat yayıb.

Bildirilib ki, tikintisi 2012-ci ildə tamamlanan, hündürmərtəbəli bina olan “Renessans Residence”də 250 mənzil var idi.

Mehmet Yaşar Coşkun İstanbul Hava Limanında saxlanılıb.

Xatırladaq ki, Türkiyədə fevralın 6-da səhər saatlarında baş vermiş zəlzələ nəticəsində indiyədək ölənlərin sayı 19 388 nəfərə çatıb. Təbii fəlakət nəticəsində 77 771 nəfər yaralanıb.