Gürcüstanlıların 73%-i Azərbaycana etibar edir

Gürcüstanda rəyi soruşulanların 73%-i Azərbaycana etibar etdiklərini bildiriblər.

“Report”un Gürcüstan bürosu xəbər verir ki, bu göstərici ABŞ-ın “Edison Research” şirkətinin apardığı sosial sorğunun nəticələrində əks olunub.

Gürcüstan vətəndaşlarının ən çox etibar etdiyi ölkələrin ilk üçlüyündə 93%-lə Ukrayna, 92%-lə ABŞ və 90%-lə Böyük Britaniya yer alıb.

Gürcüstan sakinləri arasında qonşu Türkiyə və Ermənistana etibar göstəricisi isə müvafiq olaraq 74% və 68% təşkil edir. Respondentlərin yalnız 28%-i Rusiyaya güvəndiyini bildirib, 72%-i isə əks fikirdə olub.

Gürcüstan vətəndaşlarının Avropa İttifaqı və NATO-ya inam göstəricisi hər iki halda 92%-ə bərabər olub.

Qeyd edək ki, sorğu Gürcüstanın “Formula” teleşirkətinin sifarişi ilə iyunun 23-dən iyulun 13-dək keçirilib. Sorğuda Abxaziya və Tsxinvali bölgələri istisna olmaqla, bütün ölkə üzrə 2 101 nəfərin rəyi öyrənilib.