Tbilisi. 15 yanvar. REPORT.AZ/ Gürcüstanda yeni Qanun və Hüquq Partiyası yaradılacaq.
“Report”un Gürcüstan bürosu xəbər verir ki, siyasi qurumun təsisçisi kimi publisist Tako Çarkviani çıxış edəcək.
O bildirib ki, partiyanın məqsədi korrupsiya ilə mübarizə və antikorrupsiya planının hazırlanması olacaq.
T.Çarkvianinin sözlərinə görə, partiya regional inkişaf istiqamətində fəaliyyət göstərəcək və sağ-mərkəzçi ideologiyaya xidmət edəcək.
Partiyanın bu ilin fevral ayında təsis olunması planlaşdırılıb. Hazırda siyasi təşkilatın təqdimat tarixi və proqramı dəqiqləşdirilir.
Qeyd edək ki, T.Çarkviani ötən ilki prezident seçkiləri dövründə və sonralar hakimiyyətə və prezident seçilmiş Salome Zurabişviliyə qarşı bir neçə kəskin bəyanat səsləndirib.