Ermənistanda keçmiş nazir və İrəvanın sabiq meri, ailə üzvləri Baş Prokurorluğa çağırılıb

Ermənistanın keçmiş energetika və təbii ehtiyatlar naziri, İrəvanın sabiq meri Yervand Zaxaryan, oğlu, qızı və onunla əlaqəsi olan başqa şəxslər Baş Prokurorluğun Qanunsuz yolla əldə edilmiş əmlakın müsadirəsi İdarəsinə dəvət olunublar.

“Report” xəbər verir ki, bu barədə “News.am” məlumat yayıb.

Bildirilib ki, zaxaryanlar və onlarla əlaqəsi olan şəxslərin əmlakı üzrə araşdırma aparılıb, yekun nəticə tərtib olunub. Onlar istintaq materialları ilə tanış olmaq, mövqelərini təqdim etmək üçün avqustun 15-də Baş Prokurorluğa dəvət ediliblər.

Qeyd edək ki, Y.Zaxaryan 2003-2009-cu illərdə İrəvanın meri, 2014-2016-cı illərdə isə energetika və təbii ehtiyatlar naziri olub.