Ermənistan baş nazirinin xanımı ABŞ-da etirazla qarşılanıb

Ermənistanın baş naziri Nikol Paşinyanın həyat yoldaşı Anna Akopyanı ABŞ-ın Los-Anceles hava limanında yerli erməni diasporunun nümayəndələri etiraz aksiyası ilə qarşılayıb.

“Report” xəbər verir ki, məlumatı “Sputnik Armeniya” yayıb.

Diasporun təmsilçisi Robert Markaryan bildirib: “Onu “Ali satqının arvadı!” şüarı yazılan plakatla qarşıladıq. O, başıaşağı, sifəti qızarmış şəkildə keçib getdi. Onlar bilməlidir ki, hara getsələr, belə səhnə ilə qarşılaşacaqlar”.

“Sputnik Armeniya” Anna Akopyanın doğum günü ərəfəsində ABŞ-a səfərinin məqsədini öyrənə bilmədiyi barədə məlumat yayıb. Bildirilib ki, onun köməkçiləri Ester Saakyan və Alina Karapetyan agentliyin zənglərinə cavab verməyib.

Xatırladaq ki, bundan bir müddət əvvəl Anna Akopyan Moskvaya xüsusi səfər edib. Onu iki qızı Mariam və Şuşan, habelə mühafizə xidmətinin çoxsaylı əməkdaşı müşayiət edib.