Ərdoğanın sədrliyi ilə Milli Təhlükəsizlik Şurasının iclası keçirilib

Türkiyə Prezidenti Rəcəb Tayyib Ərdoğanın sədrliyi ilə Milli Təhlükəsizlik Şurasının iclası keçirilib.

"Report" xəbər verir ki, təxminən 3 saat davam edən toplantıdan sonra verilən yazılı açıqlamada qeyd edilir ki, iclasda əsas diqqət fevralın 6-da baş vermiş zəlzələlərin fəsadlarının aradan qaldırılmasına yönəldilib.

Bununla yanaşı, Yunanıstanla ikitərəfli münasibətlərdə müsbət ab-havanın qorunub saxlanılması, antiterror əməliyyatlarının davam etdirilməsi və mayın 14-də keçiriləcək seçkilər zamanı təhlükəsizlik məsələləri müzakirə mövzusu olub.

Toplantıda həmçinin, Rusiya-Ukrayna müharibəsində Qara dənizin təhlükəsizliyinin təmin edilməsi və humanitar böhranların həlli üçün lazımi işlərin görülməsi qərara alınıb.