Danilov Britaniya istehsalı olan raketlə Krım körpüsünə endiriləcək mümkün zərbəni şərh edib

Vaxtı gələndə Ukrayna üçün təhlükə yaradacaq bütün obyektlərə zərbələr endiriləcək, bunun nə zaman baş verəcəyinə hərbçilər qərar verəcək.

“Report” xəbər verir ki, bunu Ukrayna Milli Təhlükəsizlik və Müdafiə Şurasının (MTMŞ) katibi Oleksiy Danilov “Kanal 24”ə müsahibəsində Krım körpüsünə “Storm Shadow” raketi ilə zərbə endirilməsi ehtimalını şərh edərkən deyib.

“Hər şey qabaqdadır və tələsməyə gərək yoxdur. Xüsusilə yüzdə yüz nəticə əldə etmək üçün diqqətlə hazırlaşmağınız lazım olan çox incə məsələlərdə”, - Danilov vurğulayıb.

Xatırladaq ki, Böyük Britaniya may ayında “Storm Shadow” havadan buraxılan raketləri Ukraynaya təhvil verib. İstehsalçıya görə, bu sursatın uçuş məsafəsi 250 km-dən çoxdur.

Qeyd edək ki, Krım körpüsünün uzunluğu 19 kilometrdir. Avtomobil hissəsi 2018-ci ilin mayında istifadəyə verilib və 2019-cu ilin dekabrında onun dəmir yolu hissəsi ilə ilk qatarlar hərəkətə başlayıb. Krım körpüsündə partlayış 2022-ci il oktyabrın 8-də baş verib. Hadisə nəticəsində 5 nəfər ölüb.