Tacikistan səfiri: “Laçına qayıdanlar yaxşı şəraitdə yaşayacaqlar”

“Azərbaycanın işğaldan azad edilmiş ərazilərində genişmiqyaslı yenidənqurma işlərinin aparıldığını müşahidə edirik, burada çoxlu böyük layihələr həyata keçirilir”.

"Report" xəbər verir ki, bunu Tacikistanın Azərbaycandakı səfiri Rüstəm Soli Laçına səfəri zamanı jurnalistlərə deyib.

"Bu gün yenidən Qarabağda səfərdəyəm. Burada böyük dəyişikliklərin şahidi oluruq. Azərbaycan Prezidenti İlham Əliyevin rəhbərliyi ilə genişmiqyaslı bərpa işləri aparılır və onlar uğurla həyata keçirilir", - səfir bildirib və Laçının turizm üçün gözəl yer olduğunu əlavə edib.

"Bu, dinc həyatın getdikcə bərqərar olunduğundan xəbər verir. Laçına qayıdanlar yaxşı şəraitdə yaşayacaqlar", - o deyib.