Paşinyan Putinlə Qarabağa dair danışıqların bir hissəsini açıqladı

Ermənistanın baş naziri Nikol Paşinyan noyabrın 10-da Dağlıq Qarabağda hərbi əməliyyatların dayandırılması haqqında üçtərəfli Bəyanatın imzalanmasından əvvəl rusiyalı həmkarı Vladimir Putinlə apardığı danışıqlarla bağlı bəzi məqamları açıqlayıb.

“Report” xəbər verir ki, baş nazir bu barədə özünün feysbukdakı hesabında yazıb.

"Mən Rusiya prezidenti Vladimir Putinə zəng vurdum. Putin dedi ki, onun fikrincə münaqişənin nizamlanması Rusiya təkliflərinin məntiqinə uyğun olmalıdır”, - deyə Paşinyan bildirib. Baş nazirin sözlərinə görə, Putinin təkliflərinə işğal altındakı rayonları Azərbaycana qaytarmaq, bölgədə Rusiya sülhməramlılarını yerləşdirmək daxil idi.

Öz növbəsində Paşinyan da erməni tərəfinin təkliflərini bildirib və onlar daxili müzakirələrdən sonra yenidən zəngləşməyi razılaşdırıblar.

Paşinyan etiraf edib ki, Ermənistan hökumətinin sabiq rəsmiləri, siyasətçiləri, o cümlədən keçmiş dövlət başçısı Robert Koçaryan müharibənin dayandırılmasına razılıqlarını ifadə ediblər. Şübhəsiz ki, buna erməni ordusunun cəbhədəki ardıcıl məğlubiyyətləri səbəb olub.

Baş nazirin sözlərinə görə, növbəti gün Putin ona zəng vurub və bildirib ki, Azərbaycan tərəfi sülhməramlıların təmas xətti boyunca yerləşdirilməsinə razıdır. Lakin Ermənistanın hökumət başçısı bununla razılaşmayıb: “Beləliklə, barışıq qeyri-mümkün oldu”.

Paşinyan qeyd edib ki, həmin vaxt Cəbrayıl, Hadrut və bir sıra ətraf kəndlər Azərbaycan Ordusunun nəzarəti altına keçmişdi. Həmçinin humanitar atəşkəs haqqında iki razılaşma pozulmuşdu.

Beləcə, müharibə davam edib. Bir neçə gün sonra aparılan növbəti danışıqlardan sonra Ermənistanın baş naziri atəşkəs haqqında 10 noyabr Bəyanatına imza atmağa məcbur olub.

Şübhəsiz ki, bütün bunlar Paşinyanın öz versiyasıdır. Ölkədə kütləvi narazılıqlarla qarşılaşan hökumət başçısının xalqa açıqlamadığı və ya təhrif etdiyi, habelə gizlətdiyi digər məqamlar da mövcuddur.

Qeyd edək ki, daha əvvəl Rusiya prezidenti Vladimir Putin də Nikol Paşinyanla danışıqlar zamanı Ermənistanın baş nazirinin təkliflərindən təəccübləndiyini etiraf etmişdi. Krem rəhbəri qeyd etmişdi ki, Ermənistanın 10 noyabr Bəyanatından imtinası bu ölkənin intiharı olardı.