Özcan Kars: “Ermənilərin Qarabağda törətdikləri vəhşi insanların hərəkətləridir”

“Ermənilərin Qarabağda törətdikləri vandallıqlar mədəniyyəti, sənəti bilməyən, yüksək düşüncədən məhrum vəhşi insanların etdikləri hərəkətlərdir”.

Bunu “Report”a açıqlamasında “Türkiyə Gəzginlər Klubu”nun üzvü Özcan Kars deyib.

Səyyah bildirib ki, əslən Ərzurumludur və ataları 1877-ci ildə Türkiyə - Rusiya savaşında köçə məcbur olublar: “Bu müharibədə Rusiya ordusundan daha çox ermənilərlə savaşmışıq. Orada şəhərlərə edilən təcavüzləri, insanların qətliamlarını atalarımızdan eşitmişik. İkinci dəfə eyni şeyləri Birinci Dünya Müharibəsində yaşamışıq. Mənim ailəm ermənilərin səbəb olduğu faciə ilə bağlı iki dəfə köç etməyə məcbur olub”.

“Böyüklərdən eşitdiyimiz vandallıqların simasını bu torpaqlarda canlı şəkildə gördük”, - Ö.Kars vurğulayıb.

Xatırladaq ki, səfər azad edilmiş ərazilərin “black tourism” çərçivəsində tanıdılması sahəsində mühüm əhəmiyyət kəsb edir. Ötən bir ildə dünyanın 4 əsas beynəlxalq səyahətçilər şəbəkəsinin (ETIC, MTP, TCC, “Nomadmania”) hər birinin rəhbərləri və tanınmış üzvləri səviyyəsində Qarabağ və Şərqi Zəngəzura ümumilikdə 4 dəfə böyük heyətlərlə səfərlər təşkil edilib. Hazırda sayca beşinci olan bu səfərlər nəticəsində 30-a yaxın ölkədən təxminən 200 beynəlxalq səyahətçi azad edilmiş ərazilərdəki vəhşiliklərlə, dağıntılarla, böyük bərpa və quruculuq işləri ilə yerində tanış olub. Bu isə Azərbaycanın illər ərzində məruz qaldığı vəhşiliyin dünya ictimaiyyətinə beynəlxalq səyahətçilərin gözləri ilə göstərilməsi baxımdan xüsusi əhəmiyyət kəsb edir.

Qeyd edək ki, budəfəki heyətə “Türkiyə Gəzginlər Klubu”nun prezidenti, “Nomadmania”nın qlobal reytinqinə görə, dünyanın 50 əsas beynəlxalq səyahətçisindən biri hesab olunan Salman Arınc rəhbərlik edir.