Milli Qəhrəman Şövqiyar Abdullayevin doğum günündə məzarı ziyarət olunub - VİDEO

Bu gün Azərbaycanın Milli Qəhrəmanı, Birinci Qarabağ müharibəsi şəhidi, əfsanəvi tank komandiri Şövqiyar Abdullayevin doğum günüdür.

"Report" xəbər verir ki, Milli Qəhrəmanın anadan olmasından 52 il ötür.

Bu gün doğum günü ilə əlaqədar olaraq Ş.Abdullayevin məzarının yerləşdiyi Şəhidlər Xiyabanı ziyarət olunub, onun və digər şəhidlərin xatirəsi anılıb.

Mərasimdə şəhidin ailə üzvləri, döyüş yoldaşları və yaxınları iştirak ediblər. Anım mərasiminə həmçinin Milli Qəhrəmanın qardaşı oğlu – Bakıda səfərdə olan Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayev də qatılıb.

Nuran Abdullayev

N.Abdullayev Vətən müharibəsindəki Zəfər qələbəsindən sonra ilk dəfədir əmisinin qəbrini ziyarət etdiyini bildirib. “Bu gün bizim üçün xüsusi əlamətdar gündür, Vətən müharibəsindən qələbə zəfərindən sonra ilk dəfədir ki, biz əmimin ad günü üçün bura yığışırıq. Düşünürəm ki, onun və bütün şəhidlərimizin ruhu bu gün şaddır. Biz artıq buranı ziyarət edəndə qalib xalqın nümayəndəsi kimi gələcəyik” - o, deyib.

Şəhidin qardaşı Elcan Abdullayev Şövqiyar Abdullayevin Azərbaycanın ilk Milli qəhrəmanlarından olduğunu deyib:

“İkinci Qarabağ müharibəsi dövründə elə Şövqiyar yaşda olan uşaqlar, igidlər topaqlarımızı azad etdilər. Qardaşımın da döyüşdüyü Ağdam, Şuşa işğaldan azad edildi. Mənim həmin dövrdə sevincimin həddi-hüdudu yox idi. Həm də ona görə ki, Şövqiyarın ruhu orda dolanırdı. Allah şəhidlərimiz rəhmət eləsin. Biz qürurluyuq ki, Şövqiyar kimi qardaşımız var”.

Mərasimdə Azərbaycanın ərazi bütövlüyü uğrunda canından keçən bütün şəhidlərin xatirəsi yad edilib, onların ruhuna dualar oxunub.

Xatırladaq ki, Şövqiyar Cəmil oğlu Abdullayev 1969-cu il 5 apreldə Qədim Göyçə mahalı Basarkeçər rayonunun Nərimanlı kəndində dünyaya gəlib. 1986-cı ildə Nərimanlı kəndində orta məktəbi əla qiymətlərlə bitirib, Azərbaycan Politexnik İnstitutuna daxil olub. Birinci kursu bitirdikdən sonra ordu sıralarına çağrılıb. 1989-cu ildə Monqolustanda hərbi xidmətini başa vurub Bakıya qayıdıb.

1992-ci ildə Dağlıq Qarabağda döyüşlər başlayanda o, yeni yaradılan Milli Orduya yazılmış, Ağdamda gedən döyüşlərdə tank komandiri təyin edilib. Onun tank komandiri kimi döyüşdüyü briqadası Abdal-Gülablı kəndini özünə mövqe seçmiş, Papravənd, Pircamal, Aranzəmin və digər kəndlər uğrunda ağır döyüşlər aparıb. 1992-ci il 23 avqustda Gülablı kəndi ətrafındakı strateji əhəmiyyətli yüksəklikdən onun da iştirak etdiyi tank briqadası çıxarılaraq müəmmalı şəkildə Ağdərəyə, Drambon kəndinin müdafiəsinə kömək üçün göndərilib.

Az vaxt içərisində Drambon kəndi erməni-rus birləşmələrinin müqaviməti qırılaraq azad edilib. Eyni zamanda, mühasirə halqasına düşmüş çox sayda piyada döyüşçülərimiz mühasirədən çıxarılıb. Drambon kəndi uğrunda gedən döyüşlərdə təkbaşına qalan Şövqiyar Abdullayevin tankı bir neçə dəfə vurulub. Hər iki ayağından yaralanan tank komandiri Ağdam hərbi hospitalına göndərilib.

Amma sağalmağa doğru gedən Ş.Abdullayev sonrakı müalicədən imtina edərək yenidən cəbhəyə qayıdıb.1992-ci il 27 avqustda çox ağır döyüşdə o, yoldaşlarını əsir düşməkdən xilas edib, özü isə qəhrəmancasına şəhid olub.

Azərbaycan Respublikası Prezidentinin 5 fevral 1993-cü il tarixli 457 saylı fərmanı ilə Abdullayev Şövqiyar Cəmil oğlu ölümündən sonra "Azərbaycanın Milli qəhrəmanı" adına layiq görülüb.

Ş.Abdullayev 29 avqust 1992-ci ildə Şəhidlər Xiyabanında dəfn edilib.

Bakının Nəsimi rayonundakı əsas küçələrdən birinə Milli Qəhrəman Şövqiyar Abdullayevin adı verilib.