Ekspert: “Ermənistan sabitliyin pozulmasına yönəlmiş addımları Aİ missiyasından gizlətməyə çalışacaq”

"Ermənistan Azərbaycan ilə münasibətlərin normallaşdırılması prosesinin pozulmasına yönəlmiş addımlarını Avropa İttfaqının (Aİ) missiyasından gizlətməyə çalışacaq".

Bunu “Report”a “Rusiya Elmlər Akademiyasının Dünya İqtisadiyyatı və Beynəlxalq Münasibətlər İnstitutunun Postsovet Araşdırmaları Mərkəzinin böyük elmi işçisi, tarix elmləri namizədi Stanislav Pritçin bildirib.

"Aİ missiyasının göndərilməsi ilə bağlı qərar birtərəfli qaydada, Azərbaycanın ciddi mandatı olmadan qəbul edildiyinə görə, onun funksiyası yalnız Ermənistan tərəfdən sərhəddə patrul xidməti həyata keçirmək olacaq. Sərhədin yalnız bir tərəfində olmaqla pozuntuları qeydə almaq çox çətindir, bu isə o deməkdir ki, Ermənistanın yol verdiyi bütün pozuntular nəzərə çarpmayacaq. Sabitliyi pozmağa yönəlmiş addımlar olsa belə, Ermənistan onları missiyadan gizlətməyə çalışacaq. Burada sülh yolu ilə nizamlanma üçün obyektiv və şəffaf şərait yaradılmır”, - ekspert bildirib.

Onun sözlərinə görə, Ermənistan danışıqlar zamanı Avropa ölkələri arasında öz mövqeyini gücləndirmək üçün bu məsələni üçtərəfli bəyanatın digər tərəfləri olan Azərbaycan və Rusiya ilə razılaşdırmadan missiyanı yerləşdirməyə razılıq verib.

Pritçin əlavə edib ki, Aİ missiyasının Azərbaycan və Ermənistan arasında sərhədlərin delimitasiyası, nəqliyyat dəhlizlərinin açılması və digər proseslərə heç bir təsiri yoxdur.

Xatırladaq ki, Avropa İttifaqının Ermənistandakı mülki missiyası fevralın 20-də fəaliyyətə başlayıb.