Beynəlxalq təşkilatların Qarabağdakı dağıntılarla bağlı susqunluğuna həsr olunmuş videoçarx hazırlanıb

UNESCO və digər beynəlxalq strukturlar əvvəlki kimi, erməni işğalı zamanı Qarabağda və Şərqi Zəngəzurda törədilmiş dağıntıların miqyasına göz yummaqda davam edirlər.

“Report” xəbər verir ki, bu barədə “VMedia” Youtube-kanalının hazırladığı növbəti videoçarxda deyilir.

“2020-ci il – bu, dağıdılmış Ağdam, Füzuli, Cəbrayıl, Zəngilan, Qubadlı, Laçın, Kəlbəcər və ümumi sahəsi 10 min kv.m-dən çox olan daha 300 yanayış məntəqəsidir. 30 illik erməni işğalı onları bu görkəmə salıb”, - kanalın müəllifləri qeyd edirlər.

Videoçarxda bildirilir ki, dəhşətli vəhşiliyin bu qorxunc mənzərəsi İkinci Qarabağ müharibəsinin gedişində Azərbaycan torpaqlarının Ermənistan işğalından azad edilməsindən sonra ortaya çıxıb: "Bəşər tarixi heç vaxt - nə Birinci və İkinci Dünya müharibələri, nə də hər hansı digər işğalçı müharibələr zamanı belə bir vəhşiliyin şahidi olmayıb. Lakin nə dünya ictimaiyyəti, nə UNESCO, nə də BMT Təhlükəsizlik Şurası bu cinayətləri, Azərbaycanın mədəni və tarixi obyektlərinin qəsdən məhv edilməsini pisləməyiblər”.