Azərbaycan Respublikası Minatəmizləmə Agentliyinin fəaliyyətinə həsr olunan “ANAMA” tammetrajlı sənədli filminin təqdimat mərasimi baş tutub.
“Report” xəbər verir ki, mərasimdə dövlət və özəl qurumların rəhbərləri, ANAMA Agentliyinin rəhbərliyi ictimai-siyasi xadimlər, diplomatik korpusun nümayəndələri iştirak edib.
Mərasimdə çıxış edən ANAMA İdarə Heyətinin sədri Vüqar Süleymanov bildirib ki, filmin qəhrəmanları öz həyatlarını təhlükəyə ataraq azad olunan ərazilərin mina və müharibənin digər partlayıcı qalıqlarından təmizlənməsini həyata keçirən minaaxtaranlardır:
"Filmin əsas sujet xətti işğaldan azad edilmiş ərazilərdə ANAMA tərəfindən icra edilən humanitar minatəmizləmə əməliyyatları, minatəmizləmə prosesini həyata keçirən minaaxtaranların peşəkar və məsuliyyətli fəaliyyəti və həyatı üzərində qurulub".
Filmin əsas epizodları minalanmış sahəyə qaçan inəyini xilas edərkən minaya düşən kənd sakininin monoloqu üzərində qurulub. Film minaaxtaranların işinin fonunda müharibə faciələrini yaşayan Qarabağ sakinlərinin də hekayələrini əks etdirir.
Qeyd edək ki, çəkilişləri Horadiz, Ağdam, Hadrut və Göygöldə aparılan filmin quruluşçu operatoru Nadir Mehdiyev, səs rejissoru Orxan Ağalarov, montaj rejissoru Elşad Rəhimov, prodüseri isə Tofiq Musayevdir.
![](https://static.report.az/photo/6cd819db-30b2-3c3c-88dd-11a41fdd55ce_300.jpg)
![](https://static.report.az/photo/ccba094d-6f21-3504-adf3-a56e363ffb5c_300.jpg)
![](https://static.report.az/photo/09d80644-fd1e-313b-a535-8c2d947c24c8_300.jpg)
![](https://static.report.az/photo/af315b05-29a5-3975-9482-bc157627423d_300.jpg)
![](https://static.report.az/photo/0d2a64c9-515c-3574-aa5e-6e6b744c4275_300.jpg)
![](https://static.report.az/photo/75660a25-5b29-3e62-998b-d8799b1a95ce_300.jpg)