Deputat şəhidlərin bacı və qardaşlarına müavinət verilməsini təklif edib

"Ata, anası vəfat edən, eləcə də ailəsi olmayan şəhidlərin bacı və ya qardaşları üçün müəyyən yardımlar edilməlidir".

"Report" xəbər verir ki, bunu deputat Fazil Mustafa Milli Məclisin bugünkü plenar iclasında çıxışı zamanı deyib.

O bildirib ki, şəhid ailələri üçün olan yardımlar onlarla bir yerdə yaşayan bacı və ya qardaşlarına şamil edilmir: "Halbuki belə şəxslərin sayı elə də çox deyil. Çünki bəzən olub ki, şəhid bacısı, yaxud qardaşı bir evdə yaşayıb. Yəni, o məhz qardaşının himayəsində olub və onun qazancı ilə dolanıb. Dövlət qurumlarına üzümü tutub deyirəm ki, bu, say elə də çox deyil. Onlara da müavinət və ya ev verilməlidir".