Yazıçı Seyran Səxavət Report Media Məktəbinin qonağı olub

Azərbaycanın tanınmış yazıçısı Seyran Səxavət Report Media Məktəbinin tələbələri ilə görüşüb.

O, yazıçı üçün vacib olan qabiliyyət və bacarıqlardan danışıb. S.Səxavət ədəbiyyatda həqiqəti əks etdirməyin əhəmiyyətini vurğulayıb:

“Bizim mifologiyada belə deyilir: güzgü sınanda ailəyə bədbəxtlik gəlir. Mən isə başqa cür deyirəm: güzgü sınanda ailəyə ziyan gəlir, ziyalı sınanda cəmiyyətə. Sözlə Allahın arasında parıldayan şey güzgüdür. Güzgünün bir adı da həqiqətdir. Həqiqət hər şeyin qövmündə dayanır. Həqiqət elə həqiqətdir”.

S.Səxavət istedadın yaradıcı insan üçün vacib olduğunu qeyd edib:

“İstedad ya olur, ya olmur. Bunu nə artırmaq olur, nə azaltmaq, amma xəbislik istedadla qidalanır, başlayır istedadı yeməyə. Özü də ağır zəhmət hesabına belə istedadın miqdarını dəyişmək olmur”.

Seyran Səxavət 1946-cı il martın 23-də Füzuli rayonunun Yağlıvənd kəndində anadan olub. ADU-nun şərqşünaslıq fakültəsində fars dili üzrə təhsil alıb. "Ədəbiyyat və incəsənət" qəzeti redaksiyasında xüsusi müxbir, ədəbi işçi kimi çalışıb. "Ulduz" jurnalı redaksiyasında nəsr şöbəsinin müdiri işləyib. “Daş evlər“, “Yüz ilin kişisi”, “Qaçhaqaç”, “Yəhudi əlifbası” kimi əsərlərin müəllifidir.