Son 13 ildə İraqda 455 jurnalist öldürülüb

Bakı. 27 dekabr. REPORT.AZ/ Son 13 ildə İraqda 455 jurnalist öldürülüb.

“Report” "Anadolu" agentliyinə istinadən xəbər verir ki, məlumatı İraq Jurnalistləri Həmkarlar Təşkilatı yayıb. 

Təşkilatın hazırladığı hesabatda bildirilib ki, qanunların işləmədiyi və hüququn qorunmadığı ölkədə jurnalist peşəsi ilə məşğul olmaq təhlükəlidir: "Onların təhlükəsizliyinə təminat yoxdur. İraqda jurnalistlər 2016-cı ildə çoxlu faciə ilə üzləşiblər. İl ərzində media nümayəndlərinə qarşı sui-qəsd və ölüm təhdidləri davam edib. Bu il terrorçu İŞİD qruplaşması Mosulda 20 jurnalist qətlə yetirib".

Hesabatda qeyd olunub ki, 2003-cü ildə ABŞ işğalından sonra İraqda davam edən xaotik vəziyyət səbəbindən ölkə jurnalistlər üçün təhlükəli yerlərdən biridir.