Azərbaycan Respublikası Gənclər və İdman Nazirliyi, Daxili İşlər Nazirliyinin Daxili Qoşunları və "M.Z. Production"un təşkilatçılığı ilə keçirilən “Vətən Sağ Olsun-3" Xüsusi Tapşırıq hərbi vətənpərvərlik layihəsi İctimai TV-də efirə başlayır.
"Report" xəbər verir ki, layihənin müəllifi və rəhbəri “M.Z.Production”un direktoru Üzlüfət Qasımova, quruluşçu rejissoru Tahir Xəlfəquliyevdir.
Məqsədi gənclər arasında hərbi vətənpərvərlik olan bu layihəyə 4 000-dən çox gənc müraciət edib. Yarışın əsas şərtlərindən biri hərbi xidmətdə olmayan, 18-23 yaş arası çağırışçı gənc oğlan və qızların iştirakı idi.
“N” saylı hərbi hissədə keçirilən yarışda minlərlə gəncin arasından 10 tələbə seçilərək iştirak hüququ qazanıb.
Veriliş 17 oktyabr tarixindən etibarən hər həftənin şənbə günü saat 11:15-də İctimai TV-də yayımlanacaq.
Xatırladaq ki, “Vətən Sağ Olsun” layihəsinin ilk buraxılışı 2008-ci ildə Gənclər və İdman Nazirliyi tərəfindən bütün Hərbi Qoşun növləri ilə, 2013-cü ildə isə Daxili İşlər Nazirliyinin Daxili Qoşunlarının “N” saylı Hərbi Hissəsində “Vətən Sağ Olsun 2 – Çağırarsa Vətən” adı altında həyata keçirilib.
Qeyd edək ki, "Report" İnformasiya Agentliyi layihənin informasiya dəstəkçisidir.