Bakı və Abşeron yarımadasında rəqəmli yayım üçün ehtiyat şəbəkələr quraşdırılır

Bakı. 24 oktyabr. REPORT.AZ/ Noyabrın 1-dən Bakı və Abşeron yarımadasında analoq yayımın dayandırılacağı ilə əlaqədar hazırda rəqəmli yayımın fasiləsizliyini təmin olunması istiqamətində işlər aparılır.

Radio-Televiziya Yayımı və Peyk Rabitəsi İstehsalat Birliyindən "Report"a bildirilib ki, rəqəmli yayımda dayanıqlığın təmin olunması üçün işlər aparılır: "Hazırda rəqəmli yayımda siqnalların dayanıqlığının təmin olunması üçün işlər həyata keçirilir. Ehtiyat şəbəkələr quraşdırılır".

Qeyd edək ki, Milli Televiziya və Radio Şurasının qərarına uyğun olaraq noyabrın 1-dən Bakı şəhəri və Abşeron yarımadasında analoq TV yayımı dayandırılacaq. Dekabrın 1-dən isə digər bölgələrdə də analoq TV yayımının dayandırılması həyata keçiriləcək. Televiziya tamaşaçılarından mövcud analoq TV qəbulediciləri vasitəsilə rəqəmli TV yayımının izlənməsi üçün tələb olunan zəruri avadanlığın - dekoderlərin (“Set-Top-Box”-ların) əldə olunması xahiş olunub.