"Azərbaycan media landşaftı üzrə məlumat bazası"nın təqdimat mərasimi keçirilib

Mətbuat Şurası QHT Agentliyinin dəstəyi ilə reallaşdırdığı "Azərbaycan media landşaftı üzrə məlumat bazası"nın təqdimat mərasimini keçirib.

"Report" xəbər verir ki, mərasimdə Mətbuat Şurasının rəhbəri Rəşad Məcid və bir sıra jurnalistlər iştirak ediblər.

Qeyd olunub ki, "Media landşaftı üzrə məlumat bazası" Azərbaycan media məkanı və media mühiti barədə aydın təsəvvür formalaşdıran məlumat bazasıdır.

Məlumata görə, bu istiqamət üzrə bütün informasiyaların vahid mənbədə toplanılmasına imkan yaradır ki, Azərbaycan media mühiti barədə detallı və obyektiv bilgi əldə etmək istəyən şəxslər bir mənbəyə daxil olmaqla axtardıqları bütün informasiyaları əldə edə bilsinlər.

Vurğulanıb ki, Fəaliyyət Azərbaycan Mətbuat Şurası (MŞ) tərəfindən icra olunan "Azərbaycan media landşaftı üzrə məlumat bazasının yaradılması" adlı layihə çərçivəsində icra ediləcək.

Layihənin maliyyə dəstəkçisi Azərbaycanın Qeyri-Hökumət Təşkilatlarına Dövlət Dəstəyi Agentliyidir.

Jurnalistlərin Həmkarlar İttifaqının layihənin icrası üçün metodiki və texniki dəstək verdiyi də bildirilib.